معنى أخر

..

عندما يتجاوز الخوف ذلك الشعور المقبض ..

عندما يكون يتجاوز كياننا ليشمل نطاق أوسع لا نملك الحق في حمياته ..

عندما يكون يقين ننتظره من لحظة لأخرى ..

عندما تكون أقصى أمانينا ألا يأتي ذاك المستقبل ..

عندما يحمل الأمل طعم مرارة العجز ..

عندها يكون للخوف معنى أخر ..

Just talk

البوست دا لمجرد أني انزل بوست ليس أكثر والمدونة متقعدش اكتر من كدا من غير أي حاجة

صحيح كتير كنت ببقي عايز اقعد اكتب حاجة بس كنت بكتفي بكتابتها في الاندكس بتاعي

في الفتره اللي فاتت ناس افتقدتني في مدونتي او في تعليقي علي مدوناتهم فأنا بشكرهم جداً

وخصوصاً اللي سألوا عليا علي الميل والمسنجر أو اللي جابوا نمرتي من الفيس بوك وكلموني يطمنوا عليا مش عارف اشكرهم أزاي ..

كمان كان في الفتره الماضية من ضمن الأحداث كنت مشارك دورة سياسية للأعلامين أتعرفت فيها علي ناس معتقدش أن علاقي بيهم هتكون مجرد علاقة سطحية .. جميل أن الأنسان يتعرف علي ناس جديدة ويكونوا أصدقاء ليه ..

الفترة دي شغال في حاجة معينة وبتقدم فيها أما انها تواصل الصعود أو تسقط بيها فجاة لنقطة البداية من جديد ..فربنا ييسر

وأخيراً في حاجة عايز اكتبها بس مش عارف ايه اللي بيمنعني ممكن اكتبها في الأيام القريبة المقبلة ..

أدوار كريهة

في كبرياء وغرور يدخل إلى مكانه المعتاد.. يكرر روتينه اليومي.. يتلذذ بقوته وبطشه بالضعفاء وإنكسارهم أمامه وكيف يخضعون له.. بتوسلاتهم له بالرحمة وتمجيد بطشه وقسوته.. تلتف حوله النساء يتمسحن به أو يتنظرن دورهن في خضوع ..بعضهن يفعلن ذلك طمعاً في المال والمكانة وقليل منهن قد سمع بجمالها فسيقت إليه صاغرة..

من جديد يحصي حصيلة ما أغتصبه اليوم من الضعفاء.. والأقوياء علي السواء فلا أحد يجرؤ حتي علي إبداء الأستياء حول ما يسلبه من ممتلكاتهم..

لم يؤرق يومه ويزعجه غير هذا الفتي الذي تجرأ على إعلان رفضه لظلمه.. كيف لم يخشي أن يمزق السوط جسده كما فعل بجاره العجوز عندما سلب من العجوز محصول العنب ولم يعجبه طعمه ..أو يخشى أن يلقي به لحيواناته الجائعة ويتسلي بمشاهدته يأكلوه حياً كما فعل بصاحب الحمار الذي أزعجه صوته.. أو يعلق رأسه بجوار كل تلك الرؤس المقطوعه التي تزين أسوار قصره..

يزعجه في الفتى انه لم يرتعد أمامه.. لم يجثوا علي الأرض طلباً للرحمة.. لقد تحداه ببتسامته الواثقه وهدوء كلماته القوية..

"تستطيع أن قتلي ولكن لن تستطيع إخضاعي.. فأموت متنصراً وتعيش أنت تحمل مرارة الهزيمة"

مازالت كلماته تتردد داخلي ياله من وغد حرمني متعتي وأفسد علي حياتي وسلبني احساسي بالقوة.. ورأسه المقطوع يعلن هزيمتي وانتصاره..

....

يخرج من جديد إلى غرفته حيث يلقي بجسده المنهك ويخلع ملابسه.. كم يكره ذلك الدور الذي أتقن أدائه.. ويكره إتقانه للدور.. كما يكره ظروفه المادية التي لم تتح له فرصة أنتظار عمل أخر..

يخرج من المسرح وينطلق بسيارته الصغيرة إلي منزله البسيط.. دور البطولة لا يسعده.. يحلم بأيام كان يقوم فيها بدور الفتى لا الملك..

عندما يكون الهدم حلاً

أمام الحائط وقف ينظر الشروخ التي ملأت جدار نفسه ..

لا يلبث أن يسد شرخ ويرمم حائط حتي يتصدع أخر ويمتلئ بالشروخ ..

يرمق أفق الغروب يظهر من بين شقوق الحائط الذي بدا كقضبان تضم ذلك الجريح فتسيل دماء الشمس الغاربة بينها بدلاً من دمائه التي جفت فيه من زمن ..

يأس من ترميم الشروخ المتزايدة كل يوم ..

تحالف الزمان مع تلك المعاول المتكالبة عليه ..

هو لا يملك إلا يدان لن تسدا مائة شرخ يتسع ..ولن توقفا ألف معول يهوي عليه ..

لم ينتظر صنعهم لنهايته..

ألتقط معول ليكون صاحب الضربة الأخيرة ..

...

يساوي بين أنقاض حياته السابقة والأرض ..

...

الان يستطيع أن يبني حياته الجديدة –قوية – كما يريد

معروضات

لم تعد تلك المعروضات تشكل لي متعة أو تسلية .. أصبحت أشاهدها في ملل .. تأتي كل يوم تتحرك في كل مكان حتي يدركوا أن وقت راحتي قد حان ليرحلوا لأجلس وحيداً كما أنا في بيتي الكبير المزدحم .. أظفر بساعات من الصمت الذي أتقنه من تاريخ لم أعد أحصيه ..

سخيفة فانية مهما تعدد أشكلها وألونها أو حتي نوعها .. يتنصنعون المرح ولكن لا فائده ..

في الماضي كنت أنتظر قدومهم لاراقب انفعلاتهم البلهاء في شغف ومحاولاتهم للأقتراب مني في رهبة وتبجيل والتحديق بي في زهول بين عدم التصديق أو محاولة ساذجة لسبر أغواري لمعرفه اسراري ..

ما أسخفكم من معروضات أيها البشر ..سئمتكم وسئمت سطحيتكم لم اعد ارغب في مشاهداتكم مرة أخرى .. في حاجة لبعض من التجديد والتغير ألا يوجد ما يسري عني غيركم ؟؟!!!

خواطر تمثال في متحف

--------------------------------------------------------------------

تحديث

اليوم هو احتجاب الصحف المستقلة ل24 جريدة

smile saying

الأبتسامة لغة لا يفهمها إلا القليل ...

الأبتسامة لغز قد لا يملك مفتاحة أحد ..

الأبتسامة هو الشئ الذي قد تمنحة دون أن تمتلكه ..

الأبتسامة هو ذاك الجدار التي تتسأل عما قد يختفي خلفه ..

الأبتسامة هو ما حلمت بأن يحمله واقعي يوماً ..

خدلك سكة

بالنسبة للردود علي البوست اللي فات فجزاه الله كل خير اللي عزاني في علاء واللي دعا ليه .. واتمني أننا مننسهوش في الدعاء وخصوصاً في شهر رمضان
--------------------------------------------------------------------------------------

في مني باص ..

وفي أتوبيس..

المني باص بيمشي من طريق .. والأتوبيس بيمشي من طريق تاني خالص ..

وكل واحد منهم ليه ركابه ..

وكل واحد ليه الشوارع اللي بيمشي فيها غير التاني ..

ممكن الركاب قي يوم او في مرة يكونوا واحد ..

واحيانا المني باص والاتوبيس الاتنين يعدوا على نفس الشارع في سكتهم ..

ورغم أن الاتنين بيطلعوا من موقف واحد ومحطة واحدة .. وبرضة بيوصلوا لنفس الموقف ونفس المحطة ... ألا أن الأختلاف بينهم كتبر.. لأن واحد منهم ليه طريقة وسكته اللي بيمشي فيها ..

البداية واحدة والنهاية واحدة .. المهم نختار سكتنا ..

سور وبأدينا بنيناه

أي علاقه بتنشاء بتمر بمراحل

وفي مرحله من المراحل بيلاقي الاتنين الحواجز اللي بينهم بتقل وبيقربوا من بعض أوي ويبقوا أصدقاء فعلاً والسور اللي مبينهم بيفضل يقل

ويقل

ويقل

لحد أما يبقي تقريبا مفيش حاجز مبينهم غير طوبة

وفجأه الحاجز والسور يفضل يعلي شوية بشوية

لحد أما يوصل أنه يكون زي الاول أو زي الحاجز اللي بينك وبين أي شخص متعرفوش

ويمكن أعلي

وتستغرب ليه اللي قدامك بعد ما كان أقرب الناس ليك بقى كدا

وليه بنى السور دا أتبني من تاني

بس في والواقع مش هو اللي بناه لواحده

أنت بنيت معاه ويمكن بنيت أكتر منه

لأنك لما قربت منه أوي وعرفت اللي بيضايقه

حتي لو كان شئ بسيط..

رحت خليته تابو مقدس ورسمت حوليه دائرة حمراء

ودا ممكن يخليك علي شئ من الجفاف معاه

لانك حريص عليه ومش عايز تضايقة

ومع الوقت الدواير دي بتوسع وتكتر

وتخنقك وتخنقة

فبتبني السور من تاني

مش عشان تبعد عنه ..

لا دا عشان تحافظ عليه

ويكبر السور ويبقي جدار كبير وعازل وبيقف كل طرف فيه يبصله بستغراب

أو علي الاقل في طرف بيعمل دا

وبيتمني أن الجدار اللي شارك بنفسة في بنائه ينهار ويرجع مجرد طوبة زي زمان

-----------------------------------------------------------------------

طبعاً دا افضل تحليل وأجمله من وجهة نظري بس أكيد في أسباب تانية كتير للسور دا بس لما فكرت في سبب فكرت في سبب يجعل منه رغم قبحه المعنوى شئ ليه معنى جميل وإن كان المعنى دا لا يغير من حقيقة وجود السور أي شئ

فا ليه منهدش السور دا

أقنعة ..ولكن

في ناس الواحد يعرفهم الناس دي نقية فعلاً ومن جواهم يحبوك ويحبولك الخير او علي الاقل مش بيكرهوك .. وحتي لو قصروا في حقك فدا بيكون مش مقصود ..وحتي لو حد منهم حصل منه موقف فنلتمس ليه العذر ممكن يكون تحت ضغط وظروف خلته كدا

وفي ناس تانية نعروف انهم ناس اقل ما يقال عنهم انهم عالم مش كويسه بلاش الواحد يقول عليهم اكتر من كدا تلاقي الناس دي بتكرهك ووشها مكشوف وتكرهلك اي حاجة فيها خير وتحاربك في اي حاجة لمجرد انها تحاربك وبس

وفي نوع تالت حاجة كدا مخلطة فول أبوشن .. بمعني تبان من بره انها نضيف ومستحمية وولاد ناس وهما في الاصل ولاد .......المهم دول غالبا الناس بتنخدع فيهم ما قولنا انهم بيمثلوا مستحمين ودول كمان يكرهوا ليك اي خير بس بيحاربوك من تحت لتحت .. ومفيش مانع يسرقوا افكارك او يبوظوا شغلك او علي اقل تقدير يعطلوك ويتفننوا في ازاي يأذوك وخلاص

في حين أنك ممكن يكون ليك افضال كتير عليهم وطول عمرك بتاعملهم كويس

بس تقول ايه ديل الكلب ....

الامام الشافعي لما وصف حال الناس وتعاملهم معاه قال

أني بَلَوْتُ أناس مالهم عدد فوَجَدْتُهُمُ كالدَّهرِ في الغدرِ لم يبقوا على أحدِ

إن غبتُ عنهم فشرُّ الناس يشتمني وَإنْ مَرضْتُ فَخَيْرُ النَّاسِ لَمْ يَعُدِ

وإن رأوني بخيرٍ ساءهم فرحي وإن رأوني بشرَّ سرَّهم نكدي

وسبحان الله حسيت اكنه بيكلم علي الناس دي بالذات

والغريب انهم عايشين دي دور الدعوجيه وانهم القدوة واللي بينادوا باصلاح المجتمع وحرب الفساد طيب متصلحوا نفوسكم الخربانه دي الأول

وبما ان العالم دي عالم واطيه فلازم يفضلوا واطين في عينينا وتحت مستوى نظرنا ومنخليش اللي بيعملوه ياثر علينا .. ومهما حصل هفضل في طريقي وهواصل ..

انت حقدك هيحرقك وانا هفضل في طريقي.. واسيب دول وريا يتحرقوا

وفي نفس الوقت وجودهم حوليا مسمحش انه يلوث شئ جوايا لاني هضطر اتعامل معاهم واحمي نفسي منهم أنا واللي بحبهم يعني اهم شئ اني لو رديت عليهم أني مكنش زيهم .

خلي بالك ..دا لبن

قبل كدا كنت في بوست قبل كدا أكلمت عن اللبن واللي زي اللبن

أنهاردة هكلم برده عن اللبن

هل عمرك فكرت إن اللبن دا ممكن يكون مضر..

وضرره شديد كمان

اللبن ممكن تشربه

ورغم انه لبن بكل الجمال و الفائدة اللي فيه

ممكن يكون دسم ومعدتك متستحملوش..

لأنها محتاجة لبن أخف من دا..

ممكن تستعجل وتشربه قبل ما يتغلي

ويتعبك لأنك شربته في وقت غير وقته

ومصبرتش عليه يكون جاهز للشرب ..

طيب و بعد آما يغلي..

مش يكون اشد ضرر

و خطر في لحظة معينة

لانه ممكن يدلق عليك وبدل ما تشربه ويفيدك

يحرق جلدك من بره بحرارة غليانه ..

والنتيجة تكون حروق وجلد مشوه وألم

وذكري و علامة عليك هتلازمك طول عمرك

أو هتروح بس بعد زمن..

هتحتاج فيه رعاية لحد آما تغير جلد بجلد جديد

بس هيفضل اختلاف لونة يفكرك باللبن اللي حرقك في يوم وشوهك

اللبن لازم يكون علي طبيعته.. وفي وقته ..

مش سخن يحرقك ولا بارد يتعبك ..

يكون زي مهو معقول ..

ومهما حصل هنفضل محتاجين ليه ..

ونحبه لأن هو لبن حليب..

ملاك باكي

الصبح رحت أجيب فطار .. و أنا واقف شفت بنوتة صغيرة سنها حوالي سنتين أو سنتين ونص بس كانت عاملة تعيط جامد ووشها أحمر من كتر العياط جيت اروح أشلها واشفها مع مين فواحدة ست شالتها والبنت بدائت تسكت ..فكانت قطرات العرق مغطية وشها ووشها محمر من كتير العياط فطلعت منديل أديته للست دي عشان تمسحلها وشها ..

الست دي خدت مني المنديل ومسحتلها وشها وبعدها اتفتحت في الكلام زي ما تكون مصدقت ..

وربنا يكرمك يابني ..واصلها دي بنت مرزقة .. ورزقها في رجلها دايماً .. مهو اصل دي يتيمة .. أمها ماتت وهي عايشة ..رمتها وراحت لسكتها ..

وهنا في ست تانية واضح أنها صاحبة الست دي فوجهت بقيت كلامها ليها ..

الشاب الطيب دا ادلها منديل .. مهو اصل لما أمها جت رمتها .. أنا خفت وقلت لأبو احمد دي مسئوليه مين يربيها .. نوديها ملجأ .. راح قالي لا إحنا عيالنا كبرت و اتجوزت وربنا فتحها علينا خليها نربيها و ناخد ثوابها ...ووو

أنا كنت بسمع الست و أنا باصص للبنت اد ايه وشها جميل وبرئ .. ملاك صغير ملوش اي ذنب في إن الأيدي تتقاذفها من مكان لمكان بدون ذنب أو أراده من الطفلة دي ..

بس كلام الست دي إن امها رمتها .. وأن الست دي بقت تكفلها وتربيها ..

بس دا مديش الحق للست دي إنها تتكلم وتنشر خصوصيات البنت في الشارع لأي حد تقابله ..

وميدهاش الحق إنها تتكلم عن إحسنها للبنت لأي حد ..

وميدهاش الحق إنها تأذى بالبنت بالمن عليها وذكر أمها بالطريقة دي حتى لو أمها مخطئة الطفلة دي ممكن تكون لسه مش مدركة بس مش هتستغرق وقت كبير عشان تدرك وتفهم اللي بيتقال واللي بيحصل ودا هيكون مؤذي جداً ليها ..

كان نفسي اقول للست دي علي غلطها وإنها كدا بتاذي الطفله دي .. بس مكنش مجال للحوار أو إمكانية..

فمشيت ووجه الطفلة البرئ الجميل مغابش عن بالي ..

هل في أسوء ..

كنت بفكر أن هل في أسوء من انك يكون عندك أحلام ..ويكون عندك القدرة علي التخيل .. ومش مجرد تخيل وأحلام ..لا دا أنت تقدر تخطط لأحلامك صح وعندك القدرة علي تنفيذ وتحقيق أحلامك وخطتك للمستقبل .. بس مش بتنفذ ؟!!

أن يكون جواك طاقة كبيرة وعارف أزي ممكن تستغلها .. وأزي ممكن تنمي نفسك وتحسن من وضعك ..

صحيح في ظروف وممكن تكون ضدك في بعض الوقت إنما مش في كل وقت .. ومش معني أن إنسان عنده مشاكل وظروف خاصة أن خلاص مفيش فأيده ..

لو مش ممكن تحقق كل شئ بالصورة اللي بتحلم بيها ..فعلي الأقل أنت ممكن تحقق جزئ منها ..

وهيبقي عندك أحلام معينة مش ممكن تتنازل عنها مهما كانت الظروف والمعوقات

مينفعش تقعد تتفرج علي نفسك وعلي الحياة

من حوليك من غير ما تصنع نفسك وتصنع الحياة معاك ..

متبقاش ضعيف وأنت قوي ..سواء ادام نفسك أو ادام الناس اللي متحبش انهم يشفوك ضعيف او مش ناجح ومتميز..

المهم أنك

تكسر جمودك

وتعرف قدراتك وطاقتك

وتحدد خطتك وأحلامك

و تبداء في تنفيذها

لو واحد عمل كل دا ووقف علي التنفيذ يبقي في مشكلة .. زي اللي عطشان جداً وادامة يشرب بس مش بيمسك الميا ويشرب منها..

إنما إيه السبب و إيه المشكلة دا السؤال..؟