Friday, May 4, 2007

هل في أسوء ..



كنت بفكر أن هل في أسوء من انك يكون عندك أحلام ..ويكون عندك القدرة علي التخيل .. ومش مجرد تخيل وأحلام ..لا دا أنت تقدر تخطط لأحلامك صح وعندك القدرة علي تنفيذ وتحقيق أحلامك وخطتك للمستقبل .. بس مش بتنفذ ؟!!

أن يكون جواك طاقة كبيرة وعارف أزي ممكن تستغلها .. وأزي ممكن تنمي نفسك وتحسن من وضعك ..

صحيح في ظروف وممكن تكون ضدك في بعض الوقت إنما مش في كل وقت .. ومش معني أن إنسان عنده مشاكل وظروف خاصة أن خلاص مفيش فأيده ..

لو مش ممكن تحقق كل شئ بالصورة اللي بتحلم بيها ..فعلي الأقل أنت ممكن تحقق جزئ منها ..

وهيبقي عندك أحلام معينة مش ممكن تتنازل عنها مهما كانت الظروف والمعوقات

مينفعش تقعد تتفرج علي نفسك وعلي الحياة

من حوليك من غير ما تصنع نفسك وتصنع الحياة معاك ..

متبقاش ضعيف وأنت قوي ..سواء ادام نفسك أو ادام الناس اللي متحبش انهم يشفوك ضعيف او مش ناجح ومتميز..

المهم أنك

تكسر جمودك

وتعرف قدراتك وطاقتك

وتحدد خطتك وأحلامك

و تبداء في تنفيذها

لو واحد عمل كل دا ووقف علي التنفيذ يبقي في مشكلة .. زي اللي عطشان جداً وادامة يشرب بس مش بيمسك الميا ويشرب منها..

إنما إيه السبب و إيه المشكلة دا السؤال..؟

27 comments:

Anonymous said...

انا مش عارفة

اصل انا حطاه كذا حاجة في دماغي

ومش عايزة افقر على نفسي

ينفع البوست الجاي تتكلم عن الناس الناجحة

اصلي بذاكر و بعمل بحث

و لسه ورانا مولد بعد التخرج

اكتب عن النجاح ارجوك

mohamed said...

:D

هو دا المطلوب يامنة

كل واحد يطلع اللي جواه ويحقق النجاح

منقعدش نتفرج علي نفسنا

انتي بس دوسي في المذاكرة والأبحاث

وربنا هييسر ليك الحال إن شاء الله

انا اللي كنت اقصده اني برفض ان يكون شخصية ناجة وتفشل

دعوة للنجاح أهي متزعليش نفسك :D

...

صحيح منورة يا منة :D

Anonymous said...

دى حاجة بعيشها فى الواقع

بتمنى حاجات

واخطط لها

واعلم انى بقدراتى الحالية ممكن تحصل الحمد لله

لكن مع شيئ من المثابرة

ولعد معرفتى بكل هذا
أقف مكانى ولا اتحرك نحوها

وغالبة تكون الحجة.."احتمال معرفش اوصل"

ولا ادرى حلا لهذا؟؟؟

mohamed said...

الفجرية :
هي دي فعلا المشكلة

ونفس السؤال
لييييه؟

نيوتن كان بيقول ان الفاشل هو الذي توقف عن المحاولة قبل ان يصل الي النجاح

يعني من وجهه نظره ان الفشل مش الاخفاق او عدم التوفيق

انما هو التوقف عن المحاولة

فهل كلما ممكن يكون عامل مساعد للوصول لاجابة للسؤال

انا سعيد بمروك وتعليقك واجو تكوني ضيف دائم للبلوج

أسد مسجون said...

موضوع جميل جدا يمحمد فعلا اصراحه في حاجات كتير اوي الواحد بيبقي نفسه يعملها وبيتخيل لكن للاسف مبيعملهاش لكن لازم نحاول لحد منوصل لطموحات اللي احنا عاوزنها

د.هند الفخراني(ساجده لله) said...

حضرتك جبت المعاناه اللي انا بنعيشها
او بمعنى اصح خلقناها لنفسنا

والله الواحد احيانا يقعد يكلم نفسه ليه الجمود ده اتحركي

ربنا يكرمك

Anonymous said...

بوست من اوله قولت انه مليان احباط وصراع مع النفس الجماده ومش بتتحرك او الطروف اللى بتعاند الواحد فى تحقيق الى بيتمناه
لكن فى اخره كانت دعوة للتفائل صريحه جدا ودعوه لان الواحد يتحرك ويحاول حتى لو منفذش اللى خططه بس اكيد استفاد فى انه عرف يخطط وانه عمل حاجه
لازم الواحد يحاول يستفيد من اى شىء مر بيه سواء حلو مش حلو مش مهم بس انه يطلع منه بدروس وعبر

كنت بفكر فى محاجه ماثله الايام اللى فاتت هو انى كنت اقدر اقدم كتير واعمل حاجات وفرص ضاعت منى بسبب حاجات تافهه
لكن رجعت فكرت تانى فى الموضوع ديه اولا واخيرا من عند ربنا لو كان مقدر ليكى انك تقدمى فى الحاجات ديه كنتى هتقدمى بس اكيد هو ربنا عارف الخير ليكى اكتر منك انتى يمكن هتكونى تفيىاكتر فى الحاجه اللى انتى فيها وغيره
الاهم ان الانسان مييأسش ويستمر فى المحاوله
لاييأس من روح الله إلا القوم الكافرون

جزاكم الله خيراً على البوست

mohamed said...

أحمد ..مسجون

اولا اهلا بيك في المدوانة عندي

كلامك تمام لازم نحاول ونصر علي الوصول للي احنا عايزينة

ونستعن بالله ولا نعجز






ساجده لله :
انا واحد من الناس دي
ويمكن البوست بيسال نفس سؤالك ليه الجمود وايه السبب

يعني يا جماعة نقنا ايه علشان نبداء

mohamed said...

سلوى:
أولاً اهلا بيكي يا سلوى في البلوج

انا مع الياس بس ضد الاحباط

لان الياس هو بداية التغير

اني ايأس من وضعي وارغب في التغير للأفضل


بالنسبة للتخطيط
هو خبرة كويسه فعلا

انما عمل بدون تحقيق هباء

لازم نكون مصرين علي تحقيق النجاح ويكون لينا دور

بيه منحققش كل احلمنا


وزي ما انتي قولتي ان الانسان يستمر في المحاولة

جزاك الله خيراً علي تعليقك يا سلوي

واتني تكوني صديقة دائمه للبلوج

خطــاب said...

و الله نحن لا نجيد الا الكلام

تخطيط تخطيط تخطيط

االاف المشروعات نبدأها

و صفر ننهيها

mohamed said...

ما دا اللي بعتبره اسواء شئ يا خطاب

محمد said...

جاهد وجالد ما استطعت فذوالحجى من لم تهنه مصائب وتلاد

أعانكم الله

Anonymous said...

الموضوع حلو أوى يا محمد حسيت أنك بتكلمنى أنا، تقريبا أنا عشت الحالة ده ولسة عايشاها

ومش عارفة ليه مش بنفذ دايما ابدأ وما كملش وبرده مش عارفة ليه نفس السؤال،انت قلت المشكلة بس ما قلتش الحل، صحيح الواحد لازم يبقى الحافز اللى عنده حافز شخصى يعنى يبقى حاسس وعاوز ينجح ويحقق ذاته بس أعتقد أن حيانا بنبقى محتاجين لدافع تانى حتى لو كان دافع معنوى بيبقى تأثيره قوى جدا ، بس أنا شخصيا مش عارفة اعمل ايه بحاول أوجد لنفسى دوافع مش دافع واحد بس برده ما فيش حاجة بتكمل وأصعب حاجة انك تحس انك مش عارف تعمل حاجة خالص ، كلها اجزاء غير متكاملة .. احساس صعب جدا

شيماء

mohamed said...

وضاح: ربنا يبارك فيك
دا فعلاً المطلوب المجاهدة والمجالدة

أعزك الله


شيماء :

انا معنديش الحل ولا الزرار اللي يداس عليه في الانسان فيحلله المشكلة

ان بفكر معاكم

معاك لازم يكون في دافع ونش دافع مادس لا لازم يكون في دافع معنوي

ودا هيساعد كتير


صحيح يا شمياء مش بتعلقي بالبلوج بتاعك ليه

قلمي الحر said...

اوافقك الرأي بشدة , وأومن أن على الإنسان الايقف محلك سر, وينتظر الفرصة بل عليه يبحث عنها
كلامك بيفكرني باغنية ايد لوحدها متسقفش..في الكوبيله اللي بيقول
"لوصممت تكون هتكون, جاوك قدرة هتبني الكون ..مش فاكرة الباقي ..بس الاغنية حلوة جدا
موضوعك حلو قوي يافندم

mohamed said...

تمام يا علا منقفش محلك سر

والاغنية باين عليها كلماتها ظريفة

Anonymous said...

بالطبع هناك أسوأ

الأسوأ هو أن نستسلم لتلك المعوقات والصعاب التى تقف فى طريق حلمنا

الأسوأ أن نتوقف عن الحلم لأننا فشلنا من قبل فى تحقيق أحلامنا

مش عايزين نتكلم كتير وخلاص زى ما خطاب بيقول، بس فعلا لازم يكون عندنا اصرار وعزيمة وان نشق نحن طريقا جديدا لأحلامنا إذا سدت كل الطرق الموجودة

واسمع الأغنية الجميلة دى احلم معايا
http://www.amrkhaled.net/multimedia/multimedia761.html

اسماء العريــان said...

الموضوع ده بعانى منه فى المذاكرة وجداول المذاكرة

الله المستعان

mohamed said...

أحمد الجعلي:

أولاً ازيك يا طبيب انا سعيد انك بخير ومعملتش زي الزباين بتوعك :D


كلامك تمام يا طبيب
اما ان أجد طريق أو اشق لنفسي واحداً

ولو متحركناش وكمان محلمناش مش هيبقي في فرق بينا وبين الاموات





اسماء العـــــــريان:

إن شاء الله ربنا ييسرلك الحال في المذاكرة وتاخدي بعزم الأمور

mohamed said...

صحيح يا جعلي

الاغنية جميلة

وكعادتك يا طبيب لا تاتيني الا بكل ما هو جميل

saloma said...

أولا انا عايزة اقول حاجة: لو انسان قدر انه يخطط صح ويرسم احلام واقعية، لازم انسان بالصفات دى يكون عنده القدرة على التنفيذ، حتى لو مانفذش فبيكون عارف الاسباب و لازم يحلها، وإلا يكون بيضحك على نفسه أو باللفظ الدارج( بيشتغل نفسه من الآخر)
الأسوأ من كده فوجهة نظرى انك يبقى عندك الحلم و مخططله بواقعية، بس يجى حد بجرة قلم يمحيييييلك كل أحلامك و خططك، دى بجد قمة الاستبداد و النانية ،، وأعوذ بالله من كل أنانى مستبد( يارب ابعدنا عنهم و ابعدهم عنا))

rona said...

عندك حق يا محمد والله بدام ربنا ادانا القدره والاراده على العمل والنجاح يبقى ليه نتوقف وانا مع نيوتن فى قوله ان الذى اخفق هو الذى توقف عن المحاوله الفشل الحقيقى هو ان لا نبدا فى تحقيق الاحلام

mohamed said...

فعلا يا سلمي لازم يعرف الاسباب ويقدر يحلها

اما لو كا تايه فدي تبقي مصيبة مش بيشتغل نفسه بس


اما الناس اللي بتتكلمي عنهم يا سلمي فدول قدرنا وموجودين حولينا في كل حته
بنقابلهم في الجانعة وفي الشغل وكل مكان بيرتبط بمستقبلنا

زي ما يكون هدفهم يعطلوا احلمنا

وبس مش هقول ربنا يبعدهم عنا

انا بدعي ربن يقدرنا عليهم

mohamed said...

:rona

أهلا بيك أعتقد د اول تعليق ليكي عندي

:)

فعلا احنا محتاجين البداية ومحتاجين منقفش

safa7_karmooz said...

الصورة بتاعت عبده جرافيكس

مكتبتش كده ليه :p

Anonymous said...

اه فى اسوء الاسوء انك اصلا مش قادر تحلم و لا تتخيل


الاسوء انك تبقى ملكش حياه مستقله و متردد فى انك تحلم و لا لأ

الاسوء انك تبقى مكسل حتى انك تحلم

الاسوء انك تبقا بتدور على حد يحلملك و يقولك انا عايزك تطلع كذا و الاسوء من ده انك متلاقيش الشخص ده



يعنى على الاقل انت عملت اول خطوه و حلمت



الاسوء انك متعرفش تاخد اول خطوه دى


و متحلمش






عرفت بقى ان فى اسوء

mohamed said...

باربي: متفق معاكي يا باربي وعشان كدا كنت بقول بين الموت والحية الحلم والامل
لو راحوا هيتساوي الميت مع الحي