الصبح رحت أجيب فطار .. و أنا واقف شفت بنوتة صغيرة سنها حوالي سنتين أو سنتين ونص بس كانت عاملة تعيط جامد ووشها أحمر من كتر العياط جيت اروح أشلها واشفها مع مين فواحدة ست شالتها والبنت بدائت تسكت ..فكانت قطرات العرق مغطية وشها ووشها محمر من كتير العياط فطلعت منديل أديته للست دي عشان تمسحلها وشها ..
الست دي خدت مني المنديل ومسحتلها وشها وبعدها اتفتحت في الكلام زي ما تكون مصدقت ..
وربنا يكرمك يابني ..واصلها دي بنت مرزقة .. ورزقها في رجلها دايماً .. مهو اصل دي يتيمة .. أمها ماتت وهي عايشة ..رمتها وراحت لسكتها ..
وهنا في ست تانية واضح أنها صاحبة الست دي فوجهت بقيت كلامها ليها ..
الشاب الطيب دا ادلها منديل .. مهو اصل لما أمها جت رمتها .. أنا خفت وقلت لأبو احمد دي مسئوليه مين يربيها .. نوديها ملجأ .. راح قالي لا إحنا عيالنا كبرت و اتجوزت وربنا فتحها علينا خليها نربيها و ناخد ثوابها ...ووو
أنا كنت بسمع الست و أنا باصص للبنت اد ايه وشها جميل وبرئ .. ملاك صغير ملوش اي ذنب في إن الأيدي تتقاذفها من مكان لمكان بدون ذنب أو أراده من الطفلة دي ..
بس كلام الست دي إن امها رمتها .. وأن الست دي بقت تكفلها وتربيها ..
بس دا مديش الحق للست دي إنها تتكلم وتنشر خصوصيات البنت في الشارع لأي حد تقابله ..
وميدهاش الحق إنها تتكلم عن إحسنها للبنت لأي حد ..
وميدهاش الحق إنها تأذى بالبنت بالمن عليها وذكر أمها بالطريقة دي حتى لو أمها مخطئة الطفلة دي ممكن تكون لسه مش مدركة بس مش هتستغرق وقت كبير عشان تدرك وتفهم اللي بيتقال واللي بيحصل ودا هيكون مؤذي جداً ليها ..
كان نفسي اقول للست دي علي غلطها وإنها كدا بتاذي الطفله دي .. بس مكنش مجال للحوار أو إمكانية..
فمشيت ووجه الطفلة البرئ الجميل مغابش عن بالي ..
28 comments:
رقيق اوى الاحساس اللى فى البوست يا محمد
ربنا يحفظك :)
أكيد الست دي مش فاهمة
وهيا بتفكر انها كده بتثير تعاطف الناس مع البنت
فلازم تكلمها اذا شفتها مرة تانية
وبجد لو البنت داخلة دماغك اوي ممكن تاخده وتشتريلها حاجة حلوة وتبسطها
وحكاية المنديل دي دليل على عطفك الكبير
جميل أوي البوست دا
ربنا يحفظها يارب ويكرمها
و اياكم
هيا فعلأً فاكرة انها كده هتبقى بتعمل حاجة لمصلحة البنت
بس هيا مش عارفة ان حتى احساس الشفقة دي سيئ اوى بالنسبة لأي حد.
كتر خيرها انها بتهتم بواحدة عندها ظروفها
بس مش لازم ابداً تحسسها دايماً انها اقل من بقية الناس و انها ظروفها وحشة اوى كده..
ربنا يهديها للتعامل الصحيح و يكرم البنت دي و ينشئها في بيئة صالحة سليمة
جزاك الله خيراً يا اخي
:)
دينا : واياكم :)
انتي لو كنتي شفتي البنت كنتي قولتي اكتر من دا
احمد السباعي :
اولاً منور المدونة بتعليق
ثانياً ايه يا سباعي اللي انت كاتبهولي دا :)
بنت ايه اللي داخله دماغي ياعم سباعي دي عندها بتاع سنتين
وبعدين بتتكلم علي المنديل اكنك بتفسر
حلم
هو اللي داخل علي جواز بيحصله كدا ولا ايه :D
أروي : ربنا يكرمك يا أروي ويبارك فيكي
مجاهدة :
اعتقد انه دي عارده عند الستات البسيطة انهم يكلمو كتير في كل حاجة من غير حساب
معتقدش انها قصدها او متعمده
بس في النهاية تصرف مش سليم وهياثر علي البنوتة دي
ربنا يجعله في ميزان حسناتها .. ويرزقها التصرف السليم
جزانا وايكم :)
على فكرة محمد من احسن الناس اللي شفتها بتتعامل مع الاطفال
أحمد شاهين : ربنا يكرمك علي المرور والتعليق
وابقي اتعلم مني :D
من اكتر المشاهد المؤلمة
بكاء الطفل
يااااااه
اكتر حاجه محبش اشوفها طفل يبكي
بحس بمدى القسوة والقهر لما اشوفه بيعيط
بعد ما قرأت البوست ده عايزه اعمل لوالدتي تمثال ولا بجد مش هيوفيها حقها
الحمد لله
ربنا يصبر البنت ديه لما تكبر لانها هتعاني كتير اوي
خطاب : معاك حق ومن اكتر المشاهد رحمة انك تاخده في حضنك فيطمن ويسكت
ضحكايه : ربنا يخليلك والدتك
وان شاء الله ربنا يصحلها الحال وييسر ليها الامور
فعلا عندنا مشكلة واحد يصوم يوم تلاقيه مدخل كلمة صايم في أي حوار راح يحج كل ما تيجي سيرة حاجة يدخل الحج فيها عشرين سنة
يشرب مية يقول يا سلام على مية زمزم وبعدين يحكي القصة كلها
ياكل تفاح يقول تفاح مكة وهكذا
فما بالك بكفالة يتيم قدام عيينها على طول ربنا يكفينا شر العجب والرياء
بس كان لازم تنبهها بالمحسوس عشان لو لقت كل الناس بيقولوا لها انتي بطلة وأحسنت حتتكلم أكثر وتطلب جماهير أكثر
عصفور المدينة :
دي مشكلة الشعب المصري .. وخوصاً البسطاء منه في حايتهم
لازم حاجة يكلمو عنها في كل مناسبة
بيدورو علي حاجة في حياتهم يكلمو عنها وعمل او مجد ولو بسيط يريهم ادام نفسهم
هو الست دي انا معرفهاش ولا اعرف عنها اي حاجة
مجرد واحده قابلتها في الشارع وطفلة صغيرة
طبعا ربنا يكرم الست دى على اللى هيا عملته
بس فعلا هيا محتاجة حد يقولها انها مش بس بتجرح البنت لا كمان ثوابها مش هيبئا زى ما يكون الموضوع بينها وبين ربنا
بس لو فضلت كدا البنت دى لما تكبر هتتعقد
ربنا يكون معاها
بوست احساسه عالى اوى
ربنا يكرمك
بريك :هو دا اللي بفكر فيه ..وبقول لنفسي انا ليه مكلمتهاش
انا مقولتش كلمة واحده اصلاكنت بسمع كلامها وانا باصص للبنوتة الصغيرة
ربنا يكرمك يا دكتورة :)
تصــرف الست ديه .. أكيد نابع من جهلها مش اكتر ..
بس هي متقصدش تأذي البنت .. لانها أكيد بتحبها اوي
اكيد يا كليو بتارا بتحبها .. وجهلها وتباسطها في العتامل هو اللي ممكن يخلوها تاذي البنت من غير ما تقصد
السلام عليكم
رقيق جدا احساسك بالبنت ، اعتقد لو انا مكانككان ممكن اشلها واعقد اسكت فيها لغاية لما تيجي الست تاخدها
بالنسبة للست انا معاك انا مش من حقها تاذي مشاعر طفلةرقيقة ..بس هنعمل ربنا يسامحها بقي
أى نعم المفروض ولا تتبعوا صدقاتكم بالمن والأذى، بس مانعرفش نية الست إيه(إنما الأعمال بالنيات)
لكن بجد ده قدر البنت و ربنا مابينساش عباده
انت فعلا فعلا من احسن الشخصيات اللى اتعاملت معاها من كل النواحى و خصوصا الحنيه ربنا بحفظك و خليك لباباك و لمامتك و ينجحك فى حياتك العلميه و العمليه
احساسك عالى أوى يا محمد، والصورة مؤثرة، ناس كتير فعلا ممكن يأذوا اللى حواليهم من غير قصد سواء كبير أو صغير، ربنا مع البنوتة ده أعتقد إن حياتها لن تخلو من الأحزان، ربنا يهون عليها
فعلا البوست فيه لمحه انسانيه رقيقه جدا ،ربنا يكرمك بجد
والاهم بصراحه النقطه اللى انت اثارتها
يعنى انا مش فاهمه الست دى ربنا يصلحها مش المفروض انها بتربى البنت لوجه الله ، واللى بيعمل حاجه لوجه المفروض يعملها على احسن وجه
هى كده فاكره انها هتثير تعاطف الناس مع البنت ومعاها
بس بجد هى كده بتدمر نفسية البنت المفروض تحتضنها اكتر من كده وتحسسها انها امها الحقيقيه
ربنا يحفظ كل الاطفال ويحميهم
السلام عليكم ورحمة الله وبركاته..،
مع احترامي للسيدة التي حدثتك ولأنني واجهت مثل هذه المواقف إلا أنني أرى أن هذا هو التسول المقنّع..
يمكن أكون مخطئة.. لكن دائمًا أشعر أن السبب الرئيسي في هذه القذائف النارية من الكلام في سب أم البنت والثناء على الملاك البرئ هو أسلوب لأن تجبرك على وضع يديك في جيبك وإعطاؤها ما فيه النصيب..
ولا أقول هذا هراء بل كما قولت واجهت الكثير من هذه المواقف كنت أتعامل معها في بادئ الأمر بتلقائية ولكن مع تكررها "فهمت اللعبة"..
أنصح دائمًا من يريد فعل الخير أن لا يكون هذا الخير بالمال إلا من وثقت في احتياجه بالفعل.. وأرى أن العطاء أو الصدقة العينية أفضل في حالة الشك..
مثل أن يقول لك أحد (أنا مش معايا فلوس أروح وفلوسي ضاعت.. قوله تعالى وأنا أركبك) حصلت معي والبنت ساعتها سابتني ومشيت..هههه
أو مثلا طفل من أطفال الشوارع يطلب منك ثمن الغداء بقوله ( أنا جعان وعاوز أجيب أكل) قوله تعالى أشتري لك أكل ـ حتى لو ثمن الأكل أزيد شوية مما كنت ستعطيه ـ حصلت معي في منهم بيجروا ويسيبوني وفي منهم بيأتوا معي عشان أشتري لهم الأكل.. وبالأخص في الموقف ده مهم جدًا التصرف فيه بعدم إعطاء الطفل فلوس لأنه وللأسف هيشتري يا إما سجاير أو أيًا من المكيفات الضارة..
أعتقد إني غيرت اتجاه الموضوع إلى حدًا ما..
واعتذر عن سوء نيتي إن وجدت..
وجزاك الله خيرا..
باربي : شكراً يل باربي علي المرور والتعليق ..بس انا مش متاكد انتي مين بالضبط :)
شيماء: ربنا يكرمك بس يا شيماء محدش عارف الخير فين
هدى:
متفق معاكي جداً في رأيك وكلامك يا هدي
شروق الشمس : انا حاسس انك متحاملة عليها بس في نفس الوقت النوعية اللي بتتكلمي عليها موجوده وقابلت منها كتير وبيانوا واحسن ترصف زي ما انتي بتعملي وقولتي
انا حد انت تعرفه و مش مهم مين:)
كمية الجرائم التي ترتكب في العالم كل لحظة .. لا يستوعبها بشر .. تثقل الضمير وتتعب القلب
ربنا يرحمنا برحمته
باربي: علي الرغم من لاني حاسس اني عارفك بس عادي اهلاً بيكي علي اي حال
مها: امين
ومش كل الجرائم ماديه
في جائم معنية قاتله رغم انها بترك الضحية علي قيد الحياه
في جرائم نتيجة فعل
وحجرائم نتجية عدم الفعل
جميلة اوي البوست دي ووصفك وكل حاجة
وجميل اوي كمان انك فكرت تكتب الموقف ده
Post a Comment