Sunday, September 2, 2007

سور وبأدينا بنيناه


أي علاقه بتنشاء بتمر بمراحل

وفي مرحله من المراحل بيلاقي الاتنين الحواجز اللي بينهم بتقل وبيقربوا من بعض أوي ويبقوا أصدقاء فعلاً والسور اللي مبينهم بيفضل يقل


ويقل


ويقل


لحد أما يبقي تقريبا مفيش حاجز مبينهم غير طوبة


وفجأه الحاجز والسور يفضل يعلي شوية بشوية


لحد أما يوصل أنه يكون زي الاول أو زي الحاجز اللي بينك وبين أي شخص متعرفوش


ويمكن أعلي


وتستغرب ليه اللي قدامك بعد ما كان أقرب الناس ليك بقى كدا


وليه بنى السور دا أتبني من تاني


بس في والواقع مش هو اللي بناه لواحده


أنت بنيت معاه ويمكن بنيت أكتر منه


لأنك لما قربت منه أوي وعرفت اللي بيضايقه


حتي لو كان شئ بسيط..


رحت خليته تابو مقدس ورسمت حوليه دائرة حمراء


ودا ممكن يخليك علي شئ من الجفاف معاه


لانك حريص عليه ومش عايز تضايقة


ومع الوقت الدواير دي بتوسع وتكتر

وتخنقك وتخنقة


فبتبني السور من تاني


مش عشان تبعد عنه ..


لا دا عشان تحافظ عليه


ويكبر السور ويبقي جدار كبير وعازل وبيقف كل طرف فيه يبصله بستغراب

أو علي الاقل في طرف بيعمل دا


وبيتمني أن الجدار اللي شارك بنفسة في بنائه ينهار ويرجع مجرد طوبة زي زمان




-----------------------------------------------------------------------

طبعاً دا افضل تحليل وأجمله من وجهة نظري بس أكيد في أسباب تانية كتير للسور دا بس لما فكرت في سبب فكرت في سبب يجعل منه رغم قبحه المعنوى شئ ليه معنى جميل وإن كان المعنى دا لا يغير من حقيقة وجود السور أي شئ


فا ليه منهدش السور دا




43 comments:

FloNa said...

يااه سبحان الله ده اللي بيحصل فعلا

فيه ناس بتعرف تهد السور ده تاني

وفيه ناس السور بيخنق علاقتها وبتنهار العلاقة تحت السور
!!!

بس المفروض نتعلم
دور على اللي صاحبك بحبه واعمله وابعد عن اللي بكرهه

ما تخليش حرصك عليه يضيعه منك
لما تحس ان السور ده علي
هده بايدك بقوة
اعمل حاجة ترجعك ليه

البوست جميل فكرني بكام حاجة كدة فعلا :)

اسماء العريــان said...

غدا الاثنين 3 سبتمر
استئناف قرار الحبس بالتجديد 15 يوم لمجموعة الدكتور عصام العريان ومن معه

فى محكمة شمال القاهرة بالعباسية

الساعة 10 صباحا

ارجو ممن يريد التضامن معنا ان ياتى

Anonymous said...

ساعات بيكون اختلاف المراحل ما بينكم والظروف هي عامل في بناء السور مع انهم بيكونو متفاهمين في الاول بس بمجرد ان حد فيهم ظروفه تختلف بتخلتف معاها الاهتمامات وبالتالي مش بتكون مناسبة للطرف الاخر ويبدأ السور انه يتبني

saiaf said...

كلام جميل كلام معقول ما اقدرش اقول حاجة عنه

لكن

انا شايف ان ده سبب نسبة وجودة 10% بس... ليه بقى لان الناس لما بتقرب من بعضهابتختلف العلاقة عن الاول تماما

ولما السور يبدأ انه يعلى تاننى

اعرف ان الصداقة ديه من الاول فاشلة الى حد ما

sa'7so'7te said...

محمد
بص انا هقولك
من خبراتى و قراءاتى
:)
فكل حاجة فى الدنيا دى ليها ذروة واحدة بس
بنفضل نتمادى فى كل حاجة و نعلى فيها لحد ما نوصل للذروة من غير ما نحس
و لو فضلنا على نفس اسلوبنا ده هنلاقى نفسنا بنقل و ننزل تانى و نبعد عن الذروة دى بكل سهولة و عمرنا ما هنرجعلها تانى
بس مش صعب نفضل عند الذروة لكن الصعب اننا ندرك ان احنا وصلنالها و ساعتها لازم نغير اسلوبنا
و بالنسبة لموضوعك فساعتها لازم نبطل الداء اللى فينا لتعديل الاخرين و نبتدى نتقبلهم زى ما هم و نفضل عارفين ان مافيش حد كامل و احنا اولهم
كنتم مع اسامة منير فى انا و النجوم وهواك
:)
و تحياتى ليك

break said...

تصور يا ابنى انى كنت بتكلم عن نفس الحكاية و كنت هنزلها فى بوست قريب بس انا مجاش فى بالى تفسيرك للموضوع دا خاااالص
طبعا ردى هيبئا طوووويل
البلوج بلوجى طبعا :D
هوا الموضوع ثابت اذا كان صداقة او زمالة او حب او اى علاقة جديدة انك لما بتعرف حد جديد بتبئا عندك فضول تعرف الشخص اللى اودامك وتقربو من بعض و فى نفس الوقت بتبدى تبين احسن حاجة عندك مبيبئاش قصدك الغش طبعا بس غصب عنك الوحش مش بيظهر فى اول علاقتك بحد
الناس بئا اللى بتبئا على حقيقتها دول مش كتير
وبعد فترة بتوصل ل اعلى نقطة فى ال CURVE
و بتثبت
فى الفترة دى بئا انت بتحس ان العلاقة مش بتطور دا لانها مستحيل تعلى عن كدا و اى حد بيسميها فتور بئا
عارف عامل زى ايه
زى رنات الموبايل اول ما بتعرف حد
بيبئا فيه حرررررررب رنات 24 ساعة رنات وبعد فترة خلاص بئا مرة كل اسبوع مثلا او مفيش خالص
مش معنى كدا انه فى الاول كان مهتم و دلوقتى لأ
بالعكس هوا دلوقتى شايف ان انتو وصلتو ل مرحلة ثبتو فيها ومش هتزيدو عن كدا و العلاقة مفيش حاجة تهددها
يرجع لطبيعته بئا اللى كان مخبيها فى الاول
انه مثلا مش بتاع اهتمام ولا رنات كتير ولا اتصال ولا سؤال
و احسن وسيلة هيا عدم اللح
يعنى الموضوع عامل زى الاستيك المطاط كل ما تشده لبعيد اوى هيرجع اقوى
يعنى شد نفسك ل بعيد شوية و ارجع هتلاقيكو قربتو اكتر من الاول
او اثبت على نهاية الكيرف بئا
انا بئا لما كنت هكتب البوست دا كنت هسأل هوا الموضوع بيحصل معايا انا بس ولا دا طبيعى عند الناس كلها

Anonymous said...

حلوه اوى نظرية السور دى عجبتنى :)
...
بس انا ليه رأى فى حكاية السور دى هو الطبيعى فى اى علاقة مهما كانت قويه بيبقى فيه مساحه مش هسميها سور مساحه كده بنسميها فى الاتيكيت free zone المساحه دى بتضمن للطرفين علاقة سويه،قويه،وفى نفس الوقت مش تقيله على احد الطرفين ..
يعنى انا بحب صحابى جدا وهما قريبين اوى بس هما عارفين انى مابحبش كذا فمن بدون مبالغه مشبيعملوا كده وانا شايفه ان ده بيقربهم ليه مش بيبعدهم عنى ..
الخلاصه اللى انا اقصدها ان ((التكلف))هو اللى بيصنع السور اللى انت بتكلم عنه انما مراعاة خصوصيات وشعور الاخر ده بيزيد قوة وجمال العلاقه.....
بوست جميل وعميق كالعاده يا محمد
اعذرنى جدااااا على الاطاله

ومضات .. أحمد الجعلى said...

جميل جدا هذا التشبيه، وأعتقد انه فعلا يجسد فى شكل مادى ما تمر به بعض علاقاتنا الإنسانية مع الآخرين.

ولكن اعادة بناء هذا السور من جديد لا تنبى فقط بالدوائر الحمراء التى نعتبرها تابوهات ولكن أيضا تنبنى بسوء الفهم والتفسير الذى يحدث بيننا دون ان نستوضحه، ينبنى أيضا بطول تحملنا لما قد يغضبنا من الآخرين دون أن نخبرهم بان ما يفعلونه يؤلمنا

ربما علينا من وقت لىخر وفور حدوث أى مما سبق ان نمسك المعول ونهدم ما بنى من لبنات فى هذا السور، هذا المعول فى ظنى هو الصراحة والشفافية والوضوح فيما بيننا أولا باول لنعالج أى مشكلة قد تطرا فى هذه العلاقات الانسانية

ربنا يكرمك يا محمد لا زلت تغوص بنا فى معانى جميلة للنفس البشرية

محمد said...

ما شاء الله

جميل فعلا تشبيهك
:)

فعلا .. صدقت

Abeer said...

تشبيه رائع .. بيغني عن كلام كتير
البوست ده خلاني اخد بالي من حاجات مكنتش فاهماها
:)

mohamed said...

فلونا : هتبعدي عن اللي بيضايقة ويكرهه مع الوقت هتلاقي نفسك بتبعدي عنه هو

مشكلة السور اللي من النوع دا ان مينفعش حد يهده لواحده

ارجو يكون فكرك بحاجات كويسه :)








أسماء :ربنا يرجع والدنا الغالي ويثبتكم جميعاً





سلوى: لو كان الظروف والمراحل هي العوامل اللي بتجمعهم فدول اسمهم معرف مصالح أو ناس هوائيه
وميستحقوش لقب صديق او حتي التفكير فيهم للحظة

ومش دول اللي بكلم عنهم هنا






سياف : وجهة نظر برده يا سيف

بس دول برضة اللي ربطتهم المصلحة ومتنساش انك بتقصد فئة معينة
واللي بيجمعهم عمره ما كان صداقة
واحتمال ضعيف يبقى صداقة

mohamed said...

سخسوختي :
بعد الكلام الهايل دا اسامة منير ميجيش جمبك حاجة خلاص

بس انتي ليه وصفتي تقوية العلاقات الانسانية بالتمادي؟؟
الصديق بيقبل صديقة زي ما هو بيحبة بمميزاته وعيوبة دا شئ احنا متفقين عليه

انما لو مطلعنا لادام يبقي مش لازم نرجع لورا ونقد شئ جميل أتبنى مع الأيام

شكراً يا سخسوختي علي الكومنت دا :)





بريك :
قبل اي حاجة منتظر البوست بتاعك عشان الواحد يشوف وجهة نظرك بالتفصيل ويناقشها معاكي

وزي ما انتي قولتي البلوج بلوجك ..هي دي فيها كلام ..تاخدي البسورد بالمرة ؟؟

مممم اعتقد ان اللي بيتجمل دا بيكون عشان حاجات معينة
او بيكون في هدف جواه حتى لو مكنش حاسس بيه

بالنسبة لسؤالك هو عند الناس كلها وممكن بيحصل للواحد كتير بس مش اي حد بنقف عنده ونسال نفسنا ليه بيحصل دا؟
وايه السبب؟
دا بيكون مع الشخص اللي كان عزيز علينا جداً وقريب مننا أوي

شكراً لتعليقك يا بريك ومنظر البوست بتاعك

break said...

mohamed
انا مختلفة معاك ان اللى بيعمل كدا بيبئا ل غرض جواه
حساها طبيعة البنى ادم
غصب عنك اول ما تعرف حد بتظهر اجمل حاجات فيك لان مفيش مجال انك تظهر الوحش فى الاول
المهم هوا تقريبا اللى كتبته دا كان هوا البوست بس كان هيتحبش شوية بس
ممكن اعمل بوست تحابيش و خلاص -_- <<< ايموشن صاحبك بردو
و اظن انت جاوبت على الغرض من سؤالى فى البوست :)

mohamed said...

هدى : بكون سعيد لما بتطولي وتقولي رأيك ..وعلي فكرة كدا مش أطاله خالص

انتي معاكي حق التكلف هو اللي بيعمل السور ..
بس ساعة بيكون مراعات الخصوصيات بيتفسر علي انه عدم اهتمام
او يكون في مراعاه للخصوصيات اكتر من اللازم فيبقى يشمل كل حاجة

ربنا يكرمك يا هدى كتير بيكون التعليق علي البوست افضل من البوست نفسه زي تعليقك







جعلي: لازلت تمسك بالأسباب الحقيقة حتى ما غاب بين السطور
مش بس الدوائر الحمراء كما قولت
لكن كتير بيفضل الانسان انه يحتمل وألم وضيق واحد احسن من ضيق اتنين
فالأفضل ان الواحد يتحمل ويتسامح ويتناسى وخصوصا ان كان الشخص دا يستحق

الصارحة والشفافية مطلوبة ولكن لازم يتوفر ليها المساحة او الواحد بيستبدلها بانه يتحمل ويسكت زي ما قولت

كا العادة نتفق في التحليل والأسباب ونختلف في طريق الحل والتعامل

لازالت حلولك وردية حالمة يا طبيب
ربنا يكرمك سعدت بظهروك وتعليقك

:)

break said...

http://www.srg3h.com/vb/showthread.php?t=7928

خد اللينك دا و لو نفع يبئا محرمنكش من حاجة
وعلمناك صنعة

mohamed said...

وضاح : حمداً لله علي السلامة

نورت البلوج

ربنا يكرمك





عبير :
شكراً ليكي يا عبير

اتمنى يكون مفيد :)

mohamed said...

بريك: لو انا مش حريص علي الشخص دا ممكن ادليه وش خشب

او اعاملة ببرود

ودا بيحصل كتير في مواقف في الشغل بتحتم ان الواحد لازم يكون كدا

انما الانسان اللي بكون حريص علي معرفته وصدقته هو دا اللي بكون حريص جداً علي معاملتة كويس واني مضايقوش
ويكون ليا مكانه عنده

هو تقريبا احنا متفقين كدا


شكراً علي اللينك يا دكتورة

بس مش عايز اصدمك واقولك اني بعرف اعملها هي وحاجا تانية كتير

يعني لو في وقت وبال رايق ممكن انزلكم بوستات شرح لصنعات كتييييير مع مغامراتي في المطبخ

بس الحمد لله مفيش وقت

برضه في انتظار البوست بتاعك بالتحابيش اللي عليه

قلمي الحر said...

اولا:رائع جدا الموضوع يامحمد كالعادة
ثانيا : بالنسبة لموضوع السور ..تفتكر بيكبر عشان فعلا كل شخص مش عايز يضايق التاني وخايف عليه...يعني لو حبات شخص وعرفت اللي بيضايقه أو يحزنه مش هاعمل اي حاجة او اوقل له حاجة خاصة بي عشان بحبه ومش عايزه يزعل ..لا دي انانية عارف ليه
لسبب بسيط لما اثنين بيعرفوا بعض ويقربوا جدا ويكونوا اصدقاء بحق تبقي مفروض متعة كل فيهم أنه يطمئن علىالطرف التاني ..حتى لو الكلام ده ينظبق على أحدطرفي العلاقة
المشكلة من وجهة نظرى : أن خوفنا أننا نشوف الألم على وجه وفي قلوب اللي بنحبه او بيحبونا بيخلينا نخبي عنهم ومش نقولهم حاجات كتير لاننا مش عايزين نضايقهم ، لكن للأسف في أوقات كثيرة الطرف الثاني سعادته أنه يعرف ويحس بمن يصادقه ويعيش معاه اللحظة حزن أو سعادة ..
لكنناو بكل بساطة بنحكمفي كثير من علاقاتنا أنه مش لازم يعيشهاعشان ايه ذنبه..وهنانبدأ نحط أو طوبة في السور ..وهكذا
ملحوظة مهمة
عشان السور مش يتبني نحتاج إلي :
ننسي كلمة هو ذنبه ايه على صديق تربطني به علاقة..لانه بالنسبة له مش ذنب ابدابالعكس سعادةله لما تقوله كل حاجة حتى لو هتألمه ..تقدر تقول ذنب يسأل الله إلا يغفره
الصدق والصراحة مع صديقي ومع نفسي واقوله ايه اللي مضايقني بصفة عامة أو حتى لومضايق منه
يكون عندنا فأس جاهزعشان يكسر السور أول بأول
....واسفة على الإطالة

نداء خفي said...

أنا في رأيي التحليل ده صحيح بدرجة كبيرة

وأعتقد إن السور ده بيتبني بسرعة أكبر لما كل طرف يلاقي صفة أو نقطة ضعف في صاحبه وميعرفش يتعامل معاها إزاي

لكن لو عرف يتعامل معاها من الاول إزاي السور ده في نظري مش هيكبر بالشكل الكبير ده

catroz said...

فعلا بيكبر فجاه لما تلاقى نقطه ضعف فى صديقك
ومتعرفش تتعامل معاها
ده يمكن بيقتل العلاقه بين الاصدقاء
و ده اللى حاصل دلوقتى من اتنين من اعز اصدقائى
العلاقه بتموت عشان فى حاجات مش عارفه اتعامل معاها
مش عارفه ايه الحل ...

بس على فكره .. بوست جااااامد اوووووى

Anonymous said...

السلام عليكم
بشكر ليك يا أ. محمد البوست الرائع ده بجد
انت زي مبتقول لعبت على الوتر الحساس... فعلا كل كلمة حضرتك قلتها صحيحة وبتحصل فعلا .. وبيكون الطرفين بجد علاقتهم حميمة وقوية وبيخافوا على بعض اوي ودرجة الخوف دي بتتطور لدرجة ان احدهم بينهي العلاقة دي وده لأنه من وجهة نظره انه بكده هيريح الطرف التاني من القلق الي بيسببهوله ..
طيب مادام احنا عارفين فعلا اننا منقدرش نستغنى عن الطرف الاخر .. او عرفنا غلطنا .. ففعلا زي مقلت .. ليه منهدمش السور ده الي احنا عملناه بينا وبين اكتر شخص يهمنا في حياتنا
اعتقد يا أ. محمد اننا المفروض منتوقفش عند السؤال ده
احنا لازم نبدأ بالخطوة الايجابية .. مش نكون عارفين غلطنا ومنصلحوش
يبقةى بدل منقول .. ليه منهدش السور ده ؟؟ ... نقول .. يلا نهد السور ده ونبدأ فعلا بهدمه ومنستناش الطرف التاني الي يبدأ .. لأن اكيد مادام احنا الي حسينا ان في سور يبقى احنا الي عملناه واحنا الي لازم نهده
مع خالص اعجابي ببوست حضرتك
أرجو .. ان حضرتك تقبلني من المعلقيين الجدد على البلوج بتاع حضرتك .. وشكرا
ياسمن

NeRmeeN said...

اهم حاجة ان الواحد يمسك العصايا من النص
لا يبالغ فى الحرص ...ولا يعمل حاجات تضايق اللى قدامه معتمد على درجة المعزة و القرب اللى ما بينهم

تحياتى ليك يا محمد

loza said...

انا كنت ناويه ارد رد طويل عريض

بس بريك قامت بالواجب

الموضوع فى راى ان الانسان بيكون حفظ الى قدامه وساعات بينطق الكلام من على لسان التانى
وبوصولوا لدرجه تحس انهم وااحد ومحتاجين يتعرفوا على حد جديد يختلف عنهم
ولو ركزنا شويه هنلاقى ان ال2 بعد ما بيبعدوا عن بعض بيفضلوا يتصرفوا بنفس الروح المشتركه الى اتولدت بين روحينهم وتقريبا بيكونوا نفس التفكير

Amr said...

تحليل يتقال عليه عبقري فعلا... عارف مثلا زي ايه
لو قلنا انك بتحب واحدة وهي بتقدس خصوصياتها جدا
هل انت تقرب منها وتكلمها عادي عشان السور يفضل ينخفض ولا متضايقهاش وتبعد فالسور يتبني تاني... أحييك

Anonymous said...
This comment has been removed by the author.
Famy Qandil said...
This comment has been removed by the author.
Famy Qandil said...

السلام عليكم
انا اول ما قريت التحليل فضلت افكر كدا كانى اول مرة حد ينبهى بالسور دا
فعلا علاقتنا في الحياة كلها اسوار
اللى بتبنى وتتهد
يااارب يا مصلح الاحوال
احييك على البوست بتاع حضرتك ماشاء الله جميل واضاف ليا مفهوم جديد
جزاك الله كل خير
:)

فلسطينية الهوى said...

وليه متكونش بنيت السور معاه

بسكوتك وهو بيبنيه

أنتا شايفه بيبنيه ومش قادر تتكلم

لانك لو اتكلمت هتحس انك ممكن الطرف الوحيد اللي عايز يهده


مش يمكن دي طريقته انه يبعد عنك ويقولك انك فجأة لا تعني له شيئا

هتحس انك الطرف الوحيد الحريص عالعلاقة

وكرامتك غاليه فهتقف تشوف السور بيتبنى

وداخليا متألم ومحطم


بس مش هتقدر تتكلم

لانه بنى السور .. ولبس وجه الخشب

ده رأيي


موضوع جميل جدا

noha said...

...

تحليل رائع

ومفيش كلام بعد اللى اتقال سواء فى البوست او الردود
يتقال

ربنا يكرمك

noha said...
This comment has been removed by the author.
Reem said...

بجد تدوينة جميلة اوى ربنا يوفقك

بس ليه ماحاولتش معانا فى حلول

§a§a said...

البوست دا جامد جدا يا محمد مشاء الله

تحياتى

اسماء العريــان said...

اليوم السبت الموافق 8-9

مؤتمر فى نقابة الصحفيين بعنوان

سجناء سبتمر بين الحاضر والماضى

ويحضره الاستاذ محمد عبد القدوس

بعد صلاة المغرب

ارجو ممن يريد التضامن ان يذهب

ارجو النشر

mohamed said...

علا:هو اكيد انتي ليكي وجهة نظر معينة بس انتي شايفها من زاوية جديدة ممكن ميكنش ليها تاثير فعلي علي علاقة الاصدقاء

الا في حلات معنية بس






نداء خفي:
شكراً لمرورك واهم من التعامل مع نقاط الضعف هو التصالح معاها او التكامل ليها






كات روز :
انتي قولتي وصف جامد رغم قسوتة وانه بيقتل العلاقة
شكراً ليكي يا كات

mohamed said...

soma:
وعليكم السلام ورحمة الله وبركاته

معاكي حق يا سومة .. انا في الاوب كنت هكتب اسم البوست يلا نهد السور وبعد كدا كتبت العنوان اللي موجود دلوقتي


بصراحة ردك اكتر من رائع واتمنى انك تسعديني بتعليقك علي البلوج علي طول

:)







نرمين :
المشكلة اني في حاجات مينفعش فيها النص او صعب يكون في نص

شكراً ليكي يا نرمين






لوزا :
ممكن يكون في ناس كدا فعلاً وشفت منهم كتير

وفي ناس تانية بيكنوا مختلفين في تفكرهم بس متفقين انسانياً لدرجة كبيرة جداً
ابقي ردوي وطولي عادي مش هجاسبكم علي التطويل :)

mohamed said...

عمرو :
مممممم
فعلاً دي معضله ربنا ييسر الحال







نازك :
وعليكم السلام ورحمة الله بركاته

مش اسوار بس دي اسوار وحصون وقلاع كمان

:)
شكراً ليكي يا نازك
جزانا واياكم




اَية :
انا قولت ان مش واحد اللي بيبني السور لواحده ..بس في واحد بيكون السبب

mohamed said...

نهى :
شكراً علي تعليقك ومرورك
ربنا يكرمك





ريم :
الحل ان السور دا يتهد ويتشال

باي طريقة
بس المهم ميسبب ضرر او فجوه مكان السور دا





مصطفى : ربنا يكرمك

أهلاً بيك في البلوج :)





أسماء : ربنا ييسر الحال ويردهم جميعاً سالمين

Anonymous said...

السلام عليكم
ــــــــــ
ماشاء الله بوست جميل
ربنا يوفقك

سمـــر مــاهر said...

استفدت كتير من الموضوع والتعليقات عليله

ربنا يكرمك

Anonymous said...

محمد انا هقولك حاجه انت كلامك ده فكرنى بالكتاب بتاع دكتور شريف عرفه لما كان بيقول ان كل علاقه حب (بس انا خدتها بمنطق صداقه لان حبيبتى هى صاحبتى )ليها 3 مراحل الاولى هى الانبهار و التانيه مش فاكره كانت ايه و التالته كانت التعايش المهم فى مرحله الانبهار كان بيقول ان كل طرف من الاتنين شايف التانى ملاك او هوا ده اللى هيكمله و بعد كده فى المرحله التانيه بيبتدى يشوف عيوبه و يشوف اذا كان هيتقبلها و لا لأ لو تقبلها و وصلوا لمرحله التعايش يبقى دى علاقتهم نجحت لكن لو لا يبقى كانت اصلا مبنيه على الفشل مش عارفه ايه علاقه اللى انت بتتكلم فيه بده بس ممكن انت تطلع نقطه الطرابط اللى بينهم و مستنيه ردك

المجاهدة said...

:)
البوست ده جميل جدا ماشاء الله
من اكتر اللي عجبوني من كتاباتك

اتأخرت كتير في الرد و القراية للاسف

بس اعتقد ان السور ده عمره ما هيتبني تاني لو هما اصلاً علاقتهم كويسة و ناجحة في كل شئ و كل الظروف اللي حواليهم
الناس بتبني سور مش بس عشان فيه جفاف بينهم طالع من جواهم هما
بس عشان فيه ظروف برا منهم بتحتم عليهم ان لازم يكون فيه سور موجود

انا كذا مرة اتهد اسوار كتيرة حواليا بيني و بين كتير اعرفهم
بس لبعض الظروف لازم نرجه نبندي السور و للاسف بيبقى اسد من الاول
عشان الظروف مش سامحة يفضل السور ده متشال بيني و بين اللي شيلت معاه السور من الاول



تشبيه جميل ماشاء الله و بيوضح كتير قوى :)
كنت عمالة بفتكر مواقف و احداث و انا بقرى كلاامك:)

mohamed said...

نهاوية :
وعليكم السلام ورحمة الله وبركاته

شكراً ليكي وكل سنة وانتي طيبة






سمر:
ربنا يعزك
كل سنة وانتي طيبه يا سمر




Anonymous:
هو دكتور شريف عرفه ليه نظرته التحليليه من وجهة نظره

انما مفيش انسان تقدر تطبق عليه نظريه بالمسطرة

وعلي فكرة انا بسال نفسي نفس سؤال ايه علاقة دا بالكلام اللي انا كاتبة

اهلاً بيكي وكل سنة وانتي طيبة

mohamed said...

مجاهدة :

تقريبا دا اسرع بوست كتبته سعيد انه عجبك وطلع من احسن اللي كتبته (الحمد لله طلع حاجة كويسه)

معاكي حق في ظروف بس مش مبرر لان عمر ما كانت الظروف مبرر

للاسف كلامك بيعكس واقع موجود فعلاً وان كنت مش مقتنع بيه
ورافض الاستسلام ليه


:)
المواقف كتير اكيد
ربنا يكرمك ويعزك علي التعليق

وكل عام وانتي بخير :)