الطبيعي أن أجتماع القسم بتاعنا في الجرنال بيكون يوم الأربع ودا اللي حصل فعلاً مع حبة تغيريات ظريفة ..
عملنا الأجتماع عادي خالص أنما مكنش ينفع ينتهي نهاية عادية لأنه عيد ميلاد الريسة بتاعتنا ..
أستاذتنا أمل فوزي حست بحاجة غريبة كل شوية أنا ابص ليمنى وأبص في الساعة ويمنى تبصلي وأمل تقولنا في إيه ؟؟ وجينا على أخر الأجتماع تقولنا أنتوا بتتدودوا علي إيه .. طبعاً بكل برأة يمنى قالتلها عليكي .. المهم يمنى خرجت لسارة وفضلت أنا وبدوي وناهد وقعدت أكلم في أي حاجة علي ما يدخلوا بالتورتة .. وطبعاً كنت فاتح الكاميرا عشان أصور أول اثر للمفجأة عليها :) .. وقد كان ..
طول عمري بقول أن أبلغ شكر لهدية هو أني أقبلها .. وفي اليوم دا شوفت الأبلغ من دا تقدير كبير اوي لحاجة بسيطة وصغيرة أوي عملنها ..طبعاً رؤساء الأقسام جم شاركونا كام دقيقة وسابونا مع نفسنا بقى في أوضة الأجتماعات ..
رغم أن معرفتي بأستاذة أمل مش من فترة كبيرة أوي بس بقت من الناس اللي بعزها جداً بجد ينطبق عليها لفظ "إنسانة " في اسلوبها في التعامل وفي شغلها وفي افكارها وعلاقتها .. إنسانة روحها جميلة جداً.. بصراحة مشتغلتش مع حد قبل كدا وكان بالشكل دا الجميل دا .. عايزين نبخر القسم الكبير أوي بتاعنا قبل يتحسد واحد كان بيقولي يا بختكم أنتم القسم الوحيد اللي مفيهوش مشاكل مسكاكم الأستاذة أمل ..الله أكبر .. أحنا خمسة في القسم :)
من النادر أن أشارك في حاجة زي دي ومحسش أني غريب فيها يعني تقريباً دي أول مرة .
كان نفسي أميرة تحضر العيد ميلاد معانا بس مقدرتش تيجي عشان الحادثة اللي كانت حصلتلها ورجلها متتعبش ..بس لما روحت اسلام اونلين قابلتها هناك والحمد لله أطمنت عليها لما شفتها ماشية .. دا إذا أعتبرت أن اللي كانت بتعمله دا أسمه مشي يعني .. وقابلنا دينا وهدي كمان كانت هناك وبعدا طلعت على المبنى بتاع عشرينات قعدت مع خباب شوية .. ورجعت علي المبنى اللي فيه قسم الأخبار طلعت سلمت علي إيمان وأطمنت عليها خصوصاً بعد اللي حصل يوم الأحد ..
لحد هنا كان اليوم كويس جداً يدوب لسه نازل جالي تليفونين ورا بعض عكننوا عليا .. بس علي مروحت البيت كنت تخلصت من أثرهم وفضل اليوم جميل جداً زي ما هو ..
وكل امل وأنتم طيبين