كان الزمان ...وكان

صديق متوقعتش أني أقابله تاني رغم أن كل شئ ممكن

معرفتنا ببعض استمرت لمدة 7 سنين في الفترة اللي كنا بندرب فيها مع بعض في النادي وحتى بعدها ..

عرفت منه أنه أجوز .. وبصراحة مفجأة ليا لما عرفت هو أجوز مين .. بنت رقيقة جداً كنت أنا اللي عرفتهم علي بعض
فعرضت عليه اعزمهم علي الغدا في النادي ووافق .. بقالي بالضبط سنتين إلا شهر مرحتش النادي من أخر مره كنت هناك ..

رحنا النادي طبعاً كل حاجة شكلها اتغير من أيام مكنا لسه في اعداد أو حتي ثانوي بنقعد علي الازحة نصتاد السمك ونرمية تاني في الميا .. وهي كانت تيجي تتفرج وساعات تساهم في العك اللي بنعكه .. أو نجيب ازايز الحاجة الساقعة الفاضية ونرميها في الميا ونتفرج عليها وهي بتبقلل ..
ولما كنا بننزل نشد بالمراكب في عز البرد والميا بتغرقنا ..

هي أول ما وصلت عرفتني علي طول وانا كنت مبسوط أني شفتها تاني .. أخر مره كنت شفتها فيها وأنا في المستشفي جت زارتني وبعدها كلمتني كام مرة واختفت بعدها ..

طبعاً البهوات اتجوزا من ورايا ..يلا المهم أنهم مبسوطين مع بعض وربنا فتحها عليه ..

وحكولي عن حياتهم وازاي الموضوع جي ازاي من غير تعقيد وانا حكتلهم عن حياتي والجديد في حياتي اللي مفيهوش أي جديد ..
وهي قالتلي أني اتغيرت كتير مش في الشكل بس بتقولي روحك اتغيرت مبقتش مرحة وخفيفة زي زمان ..

وفي الأخر كانوا عايزين ازورهم في البيت بس اتفقنا أنها تكون في وقت تاني

والجميل اني لما قالباهم كانوا فراحنين أتهم شافوني بجد مش مجرد مجاملة أو كان لقاء بارد زي اللي بيحصل لما تقابل حد مشفتوش من زمن يدوب تلسم عليه في السريع بعدها تنطلق ..

وطول ما أنا مروح عمال أفتكر مواقف وذكريات ليهم ولناس تانية قابلتهم في حياتي منهم اللي أختفوا خالص ومنهم اللي بيظهروا من وقت للتاني ؟؟
ومين تاني أحواله اتغيرت كدا ؟؟
وبقول لنفسي مين من اللي أعرفهم دلوقتي ممكن اقلبه أدام لو أتسع لينا العمر .. وتكون أحواله أتغيرت كدا ..؟؟
وهل لو أتقابلنا هيكون لقاء دافئ وبنفس الروح الجميلة دي ؟؟؟

أسف ..طب وبعدين

بعد أي موقف أو كلمة ..هل كلمة " أسف " كفاية عشان تصلح اللي حصل ؟؟؟

يعني أكيد مش هتساوي أن حد يكون مضايق ولو لثانية واحدة وبالذات لو الشخص دا ليه معزة خاصة عندك ..

هي فعلاً مش هتصلح حاجة سواء كان موقف كبير أو صغير ..النتيجة واحدة وهي أنك ضايقته ونكدت عليه حتى لو كان دا بدون قصد ..

ساعتها كلمة " أسف " مش هتفيد بحاجة ولكن لازم تقولها طالما كنت تعنيها فعلاُ

وتتمنى أن الطرف التاني يقبلها يمكن دا يخفف بعض من ضغط الموقف عليك ..

وأهم من دا أن الطرف التاني يبقى كويس فعلاً

ساعتها ممكن تبداء تحس بالراحة ..ويبقى الأعتذار بيعبر عن مدى أهمية الشخص دا بالنسبة ليك أكتر منه أسف علي موقف أو معني غير مقصود ..

سؤال لحبيبتك .. ليه؟

البنت بعد الخطوبة أو الأرتباط أو حتي بعد أما تصاحب .. بيحصل للبعض منهم تغيرات ميتافيزيقيه ..

بقول بعض أهو مش بعمم لأن في حبة قليلين مش بيحصلهم الحاجات دي..

يعني لو مصاص دماء أو أكل للحوم البشر هيحس بالخجل من أدائه جمبهم ..

وتبصلهم تقول سبحان الله من ناقصلها غير مقشة وتطير ..

وتبص علي سبب واحد للي بيعملوه متعرفش ..

دا غير التغيرات النفسية والسيكولوجيه ..

فتلاقي البنت أكتسبت خبرة إستارتيجية عسكرية هايله في رسم الخطط ونصب الكمائن والفخاخ

وخطط طويلة المدى وقصيرة المدى ومنوارات يعني بسم الله ما شاء الله حاجة مفيش بعد كدا ..

بالإضافة للقوة النفسية اللي بيكتسبوها فجأة ..

مش قولنا في قدرات ميتافيزيقيه مش هتحرمك من أي حاجة .. حبيبة فول أوبشن أهي ..

ممكن تعيشك حياة نابليون وهو في المنفى لو حبيت .. أو تبقي متتخيرش عن الملك لير في حاجة ..

السؤال هو ليه كل دا ؟؟

وبتستفيدو ايه من روا اللي بتعملوه ؟؟

ودا هيفضل سؤال حجري يستحيل تفتيته ..





ملحوظة رفيعة ارفع من واحدة معايا في الشغل وبتقولي إنها عاملة رجيم : أنا مش خاطب ولا مصاحب ..عشان محدش يجي يقول دي صاحبتك بس اللي كدا ..

واصل التحليق

بين فوق وتحت لحظة أو موقف وبعدها بندخل في حاله أو نخرج منها ..

بس الدخول عادة بيكون سهل وسريع عكس الخروج لازم يكون مراحل وبيكون صعب إلي حد ما ..

لأنه غالباً بيكون تراكم لأشياء كتير ممكن تكون صغيرة بس مع كترها بيكون السقوط سريع وقوي .. ومؤثر

سواء كان السبب النهائي صادم وغير متوقع أو كان منتظر من زمن بس بنتجاهل حقيقته لمجرد إننا مش عايزين نصدق ..

في اللحظة دي بيكون في وقت لقرار لازم ناخده مع نفسنا لو مخدنهواش خسراتنا هتتضاعف وتفضل تتضاعف لحد أما نفوق تاني ..

المهم نكون مدركين دا ويكون عندنا الرغبة والقدرة لأتخاذ القرار الصح والمناسب لينا في نفس الوقت ..

ساعتها هتقدر تحافظ علي نفسك ..

تخلص من محركات نفسك السلبية .. ووصل التحليق عالياً

هدية .. وإهداء

انهاردة حصل معايا موقف مكنتش اتخيله ..

بجد أول مره يحصل معايا كدا

المفروض انهارده الحفل الختامي للكومت ..

واللي الجروب بتاعنا خد احسن بروكر فيه وطلعنا الأول .. بس عرفت أن محدش كان متوقع لينا دا خالص ..

الموقف بقى ان الكل من اخر يوم وكل واحد ماسك اندكس بيكتب للتاني فيه حاجة للذكري حتى ناس كتير جابتلي الاندكس بتاعها كتبتلها فيه..

منهم ناس كان ليهم مواقف معايا واحب فعلاً اكتبلهم ...

فين بقى الموقف اخش في الموضوع بس بحطكم في الصورة الأول..

لقيت حد بيقولي أنا عايز اكتبلك.. قولته معيش اندكس وابتسمت ليه ابتاسمة مجاملة وخلص الموضوع علي كدا ...

بس مكنش خلص لقيته راح اشتري ليا اندكس مخصوص وقالي اهو عشان اكتبلك وبقيت الناس تكتبلك كمان ..

بصراحة استغربت جداً .. واللي استغربته اكتر أن وانا ماشي كان في 18 واحد من الناس اللي موجودة كتبولي فيه ..

وفي كلمات معينة أثرت فيا أوي ر غم أنها بسيطة جداً ..

دا غير اني مكنتش متوقع ان حد يهتم بالشكل دا .. لاغم اني كنت متوقع أن محدش يعرف اسمي ايه أساسا .. بس اكتشفت ان مفيش حد مسمعش عني حتي بتوع الأقسام التانية ..

كلماتهم دي حستها صادقة ومش مجبرين عليها وخصوصاً إننا مكناش نعرف بعض إلا في فتره المحاضرات والعملي وكمان ممكن منشفش بعض تاني إلا لو جمعنا القدر مره تانية ..

بس أن حد يكون حريص انه يكتبلي ويصور معايا او انه ياخد الكونكت بتاعي دا الشيء اللي مكنتش متوقعه ..

واد ايه حسسوني اني قصرت جامد في حق الجروب بتاعي اللي كنت السبب في تكوينة .. صحيح طلعنا الاول ولكن جت عليا فترة بسبب مشاكلي الخاصة وضغط الشغل كنت هتخلي عنهم . لولا كلمات سارة ليا قبل بداية الكونفرنس بكام ساعة ..

فرحت وانا عارف اني مش هعمل اي حاجة لكن اول ما قابلت قابلت مصطفي اللي شجعني جامد كداً ..

وبعد اول سيشن لقيت نفسي نسيت الدنيا وغرقت في الشاشة والارقام

ولما علي كان بيجي يقولي احنا ترتيبنا التالت كنت حاسس بالذنب اوي وكنت بعمل كل اللي اقدر عليه لحد اما اتقدمنا وعلي اخر اليوم التاني كنا الاول ..

كنت سعيد ليهم .. صحيح وقتها مفرحتش زيهم وهما لاحظوا دا بس السبب مكنش هما ... بس بجد أنا سعيد بناجحنا دا واللي محدش توقعه لينا ..

علي
عبد الله
علياء
غادة

بجد شكراً ليكم

وكلمة شكراً مش كفاية عليكم


مصطفي واشرف وسارة وحسام

سعيد أني بقي ليا اصدقاء زيكم وأنكم كنتم السبب في اللي لقيته من الناس أنهاردة ... مفيش اجمل من اللفتات الإنسانية البسيطة في الفعل الكبيرة في المعنى ..

win ..but

لا معنى للنجاح إن لم تجد من يشارك فرحتك به..

و منتهى التطفل أن تشارك من هم أخرين بعض من فرحتهم أو أن تسعد بهم دون دعوة أو اذن منهم ..