خلي بالك ..دا لبن

قبل كدا كنت في بوست قبل كدا أكلمت عن اللبن واللي زي اللبن

أنهاردة هكلم برده عن اللبن

هل عمرك فكرت إن اللبن دا ممكن يكون مضر..

وضرره شديد كمان

اللبن ممكن تشربه

ورغم انه لبن بكل الجمال و الفائدة اللي فيه

ممكن يكون دسم ومعدتك متستحملوش..

لأنها محتاجة لبن أخف من دا..

ممكن تستعجل وتشربه قبل ما يتغلي

ويتعبك لأنك شربته في وقت غير وقته

ومصبرتش عليه يكون جاهز للشرب ..

طيب و بعد آما يغلي..

مش يكون اشد ضرر

و خطر في لحظة معينة

لانه ممكن يدلق عليك وبدل ما تشربه ويفيدك

يحرق جلدك من بره بحرارة غليانه ..

والنتيجة تكون حروق وجلد مشوه وألم

وذكري و علامة عليك هتلازمك طول عمرك

أو هتروح بس بعد زمن..

هتحتاج فيه رعاية لحد آما تغير جلد بجلد جديد

بس هيفضل اختلاف لونة يفكرك باللبن اللي حرقك في يوم وشوهك

اللبن لازم يكون علي طبيعته.. وفي وقته ..

مش سخن يحرقك ولا بارد يتعبك ..

يكون زي مهو معقول ..

ومهما حصل هنفضل محتاجين ليه ..

ونحبه لأن هو لبن حليب..

ملاك باكي

الصبح رحت أجيب فطار .. و أنا واقف شفت بنوتة صغيرة سنها حوالي سنتين أو سنتين ونص بس كانت عاملة تعيط جامد ووشها أحمر من كتر العياط جيت اروح أشلها واشفها مع مين فواحدة ست شالتها والبنت بدائت تسكت ..فكانت قطرات العرق مغطية وشها ووشها محمر من كتير العياط فطلعت منديل أديته للست دي عشان تمسحلها وشها ..

الست دي خدت مني المنديل ومسحتلها وشها وبعدها اتفتحت في الكلام زي ما تكون مصدقت ..

وربنا يكرمك يابني ..واصلها دي بنت مرزقة .. ورزقها في رجلها دايماً .. مهو اصل دي يتيمة .. أمها ماتت وهي عايشة ..رمتها وراحت لسكتها ..

وهنا في ست تانية واضح أنها صاحبة الست دي فوجهت بقيت كلامها ليها ..

الشاب الطيب دا ادلها منديل .. مهو اصل لما أمها جت رمتها .. أنا خفت وقلت لأبو احمد دي مسئوليه مين يربيها .. نوديها ملجأ .. راح قالي لا إحنا عيالنا كبرت و اتجوزت وربنا فتحها علينا خليها نربيها و ناخد ثوابها ...ووو

أنا كنت بسمع الست و أنا باصص للبنت اد ايه وشها جميل وبرئ .. ملاك صغير ملوش اي ذنب في إن الأيدي تتقاذفها من مكان لمكان بدون ذنب أو أراده من الطفلة دي ..

بس كلام الست دي إن امها رمتها .. وأن الست دي بقت تكفلها وتربيها ..

بس دا مديش الحق للست دي إنها تتكلم وتنشر خصوصيات البنت في الشارع لأي حد تقابله ..

وميدهاش الحق إنها تتكلم عن إحسنها للبنت لأي حد ..

وميدهاش الحق إنها تأذى بالبنت بالمن عليها وذكر أمها بالطريقة دي حتى لو أمها مخطئة الطفلة دي ممكن تكون لسه مش مدركة بس مش هتستغرق وقت كبير عشان تدرك وتفهم اللي بيتقال واللي بيحصل ودا هيكون مؤذي جداً ليها ..

كان نفسي اقول للست دي علي غلطها وإنها كدا بتاذي الطفله دي .. بس مكنش مجال للحوار أو إمكانية..

فمشيت ووجه الطفلة البرئ الجميل مغابش عن بالي ..

هل في أسوء ..

كنت بفكر أن هل في أسوء من انك يكون عندك أحلام ..ويكون عندك القدرة علي التخيل .. ومش مجرد تخيل وأحلام ..لا دا أنت تقدر تخطط لأحلامك صح وعندك القدرة علي تنفيذ وتحقيق أحلامك وخطتك للمستقبل .. بس مش بتنفذ ؟!!

أن يكون جواك طاقة كبيرة وعارف أزي ممكن تستغلها .. وأزي ممكن تنمي نفسك وتحسن من وضعك ..

صحيح في ظروف وممكن تكون ضدك في بعض الوقت إنما مش في كل وقت .. ومش معني أن إنسان عنده مشاكل وظروف خاصة أن خلاص مفيش فأيده ..

لو مش ممكن تحقق كل شئ بالصورة اللي بتحلم بيها ..فعلي الأقل أنت ممكن تحقق جزئ منها ..

وهيبقي عندك أحلام معينة مش ممكن تتنازل عنها مهما كانت الظروف والمعوقات

مينفعش تقعد تتفرج علي نفسك وعلي الحياة

من حوليك من غير ما تصنع نفسك وتصنع الحياة معاك ..

متبقاش ضعيف وأنت قوي ..سواء ادام نفسك أو ادام الناس اللي متحبش انهم يشفوك ضعيف او مش ناجح ومتميز..

المهم أنك

تكسر جمودك

وتعرف قدراتك وطاقتك

وتحدد خطتك وأحلامك

و تبداء في تنفيذها

لو واحد عمل كل دا ووقف علي التنفيذ يبقي في مشكلة .. زي اللي عطشان جداً وادامة يشرب بس مش بيمسك الميا ويشرب منها..

إنما إيه السبب و إيه المشكلة دا السؤال..؟

زي اللبن

اللبن ..

يعني البياض والنقاء ..

يعني الفطرة ..

يعني أول ما يدخل جوف ابن آدم بعد الخروج من رحم أمه..

ابيض ..نقي ..جميل .. مفيد ونافع ..صافي

مش هتلاقي اللبن كدا لواحده

هيكون جواه علبة كرتون

هيكون جوا وعاء نحاس.. ألمونيوم ..زجاج

أو حتى خشب

الوعاء اللي حاوية مش مهم

إنما المهم انه لبن وان الوعاء يكون مناسب ليه

ولو مش مناسب ممكن يتغير بسهوله

بس

ممكن يكون في حبة شوائب

الشوائب دي ممكن تقلل من قيمته ؟؟؟

معتقدش لأنها دخليه عليه

وممكن تتشال منه

بتكون فيه وجواه إنما مش بتختلط بمكوناته ولا تمتزج بيه

عشان كدا قيمة مش هتقل و يفضل زي ما هو

والشوائب دي ممكن تنتزع منه ..

ويبقي زي ما هو ...لبن حليب

إهداء لكل من لمست فيه النقاء

إهداء لدم أمتزج بدمي فمنحني الحياة

إهداء لـ..دينا ..عمر..إبراهيم..و آخرون

أول بوست ..

بسم الله

أول بوست أكتبه المفترض أتكلم واحكي عن ليه عملت بلوج وليه الاسم دا و وطريقة الكتابة
ليه المفروض اكتب مقدمة أقول فيها كل دا ؟؟
طيب وليه مكتبش مقدمة!!

فكرة البلوج عندي من فتره كبيرة جداً إنما أول محاولة جادة كانت قبل رمضان الماضي والبلوج الحالي الثالث أرجو انه لا يصادف نفس المشاكل اللي صادفها اخوته السابقين
وبعد أسماء عددها أكبر من سكان منطقة شعبية ولكن عند التنفيذ لقيت نفسي بعمل شئ تاني خالص

أعتقد أن البلوج هيحمل رأي بحرية أكبر ويعبر عني يعني انزل عليه مواقف ولقطات بقف عندها وأفكر فيها و خواطر وأفكار و آراء في حاجات بتحصل وموقفي منها وممكن بعض الكتابات والأشعار بس علي استحياء لأني حتى مش بخلي اقرب الناس ليا يطلع عليها أو يعرف أنى بكتب فلما انزل حاجة يبقى سبق جامد جداً لأي حد يدخل علي البلوج
ومن حين لأخر انزل اخر مغامراتي في عالم التصوير
وبما أني صحفي يبقي طبعاً أول بأول لما ينتشر ليا هنزلها هنا أو أجيب لينك ليها

الجميل أن في ناس هتعرف شخصيتي بمنتهى الصراحة وهسيب التدوينات تتكلم مع الوقت